Баракелде - Алмазбек Атамбаевдин жубайы Раиса Атамбаева кесиби боюнча врач, медицина илимдеринин кандидаты. Бул тууралуу «De-факто» гезити 24-январда чыккан санында жазган.

Гезитте жазылгандай, буга чейин бир дагы жолу гезитке чыккан эмес, маек да берип көргөн эмес.

«Бир гана ирет гезит бетине чыкканы эсибизде. 2005-жылдын 24-мартында Раиса Атамбаева дагы революционерлердин катарында жоогазын көтөрүп, күйөөсүнүн жанында жүргөн. Акаевдин бийлиги кулагандан кийин «Агым» гезитинин 1-бетине жоогазын көтөрүп чуркап келаткан Рая Атамбаеванын сүрөтү чыккан. Бирок ал Атамбаевдин аялы экенин окурмандар билген эмес», - деп жазат гезит.

Гезит жазгандай, Рая Минахмедовна Атамбаева Орусиянын Урал жергесинде туулган татар кызы. Ата-энеси кийин Кыргызстанга көчүп келип отурукташып калган, ал Ош шаарындагы Ломоносов атындагы орто мектепти аяктаган. Кыргыз мамлекеттик медицина институтунда окуган, медицина илимдери деген окумуштуулук даражасы бар.

«Бирок врач, окумуштуу экендигине карабай соңку жылдары үйдө эле отуруп калган. Атамбаев жубайынын колу менен жасалган гана тамактарга алымсынат, мурда түштөнүүгө да дайым үйүнө гана барчу дешет», -деп жазат гезит.

Гезит белгилегендей, Атамбаев анын иштешине каршы болгонбу ким билет, акыры иштебей үйдө отуруп калганына бери дегенде 6-7 жыл болуптур. Ал эми уулу Кадыр былтыр мектепти алтын медаль менен бүтүрдү. Акыркы коңгуроодо Алмазбек Атамбаев «Уулумдун окууну кантип окуп, кантип бүтүп жатканын билбей калдым» деп сүйлөгөн.

«Чынында эле А.Атамбаев жалаң саясат деп жүрө берип, баласы кантип 17ге чыкканын деле байкабай, ал эми үй түйшүгү жана балдарды тарбиялоо жалаң жубайынын мойнунда болуп келген», деп жазат гезит.

Гезиттин маалыматы боюнча, уулу Кадыр Түркиядагы америкалык университетте окуйт. Кызы Алия 9-класста. А.Атамбаевдин негизи 6 баласы бар. Биринчи жубайы Бүажардан 4 баласы бар, Сейитбек, Сейтек жана эгиз кыздары Диана менен Динара. Биринчи май райондук аткаруу комитетинин төрагасынын орун басары болуп иштеп турганында алган квартирасын биринчи бүлөсүнө калтырып кеткен экен. Ошондон кийин, 1988-жылы Раиса Мидахмедовнага үйлөнүп, Кадыр аттуу уулдуу, Алия аттуу кыздуу болгон.

«Раиса Атамбаеваны жакындан билгендер эстүү жана токтоо аял дешет. Көбүнчө үйдө, айрым учурда чакыруу болсо сүрөтчүлөрдүн көргөзмөсүнө барып калганын көрүүгө болот», - деп жазат гезит.

Гезитте жазылгандай, Атамбаев ант бергенден кийин КСДПчылардын отурушу болуптур. Ал кечеде бирөө Атамбаевге гүл берсе, президент кетип баратып ал гүлүн ары жакта отурган Раиса Атамбаевага тапшырыптыр. Ошол кечеде Раиса Атамбаева ар бир столду кыдырып, ошол жердегилердин ар бирине ыраазычылыгын билдириптир.

«Анан ушуну менен эч жакка чыкпасын, мындай кечеге биринчи жана акыркы жолу келип атканын кыйытыптыр. Анысын угуп кубанып атабыз. Алиянын чачын өөрүп, сабактарын көзөмөлдөп, мектепке узатып, тосуп алып үйдө эле отурганга не жетсин?», - деп жазат гезит.

Гезит белгилегендей, Майрам Акаевага окшоп фонд түзөм, коомдук ишке аралашам дегенден кудай сактасын.

«Эмнеси болсо да, президент Атамбаевдин бала-чакасына ыйман берип, окуп аткан окууларын окуп, буга чейин кылып келген иштери менен алек болуп, атасынын ишине кийлигишпейт деген үмүтүбүз чоң. Буга чейин элге чыгарбай тыюу салып келген А.Атамбаев эми деле тыюу салаар», - деп жазат гезит.