Баракелде - Талас облусунда өткөн 2011-жылы укук коргоо органдары тарабынан экономикалык, терроризм, диний экстремизм, уюшкан кылмыштуулук жана коррупцияга каршы күрөшүү боюнча бир топ иш-чаралар жүргүзүлдү. Бул тууралуу обладминистрация басма сөз катчысы Мухамеджан Суранчиев билдирди.

Талас облустук мамлекеттик администрациясынын коргонуу жана укук коргоо бөлүмүнүн маалыматына караганда, 2011-жылы облус боюнча 862 кылмыш иши катталса, анын ичинен 778 ишке тергөө амалдары жүргүзүлүп, 700 кылмыштын бети ачылган, ачылган кылмыш иштери 90%ды түздү. 2010-жылга салыштырмалуу кылмыштын бетин ачуу 4,7%га жогорулаган.

Уюшкан кылмыштуулукка жана коррупцияга каршы күрөшүү багытында 2011-жылы облустун аймагында 27 кылмыш иши аныкталган. Жыл башынан бери алдамчылык боюнча - 4 факты, опузалап талап кылуу боюнча - 4 факты, кызмат абалын кыянаттык менен пайдалануу боюнча - 3 факты, баардыгы болуп 13 коррупция багытындагы кылмыштар аныкталган.

Бул багыт боюнча мамлекетке 3млн 547,6 миң сомдук материалдык чыгым келтирилип, анын ичинен 3 млн 544,5 миң сому мамлекетке өндүрүлгөн.

Эң эле көйгөйлүү маселердин бири болуп мал уурулук эсептелет. Бул багытта 2010-жылы 63 фактысы катталса, 2011-жылы 103 кылмыш иши катталган, же 40 кылмышка көп катталган, катталган 103 мал уурулук фактысынын 86сынын бети ачылып, кылмыштын бетинин ачылышы 83,5%ды түздү.

Облустун аймагында мал уурулук фактыларынын алдын алуу боюнча 2011-жылдын ичинде эле «Скотокрад», «Касапчы» аттуу 5 оперативдик рейддер жүргүзүлүп, 57 кылмыштын бети ачылып, 30 издөөдө жүргөн кылмышкерлердин жүргөн жери аныкталып кармалган. Мындан тышкары 2011-жылы мал уурулукка тиешеси бар болгон 36 адамды түзгөн 14 кылмышкер тобу кармалган.

Мал уурулук фактылары боюнча келтирилген материалдык чыгым 8 млн 140 миң сомду түзүп, анын ичинен ээлерине 3 млн 545 миң сому кайтарылды.