Баракелде - 2012-жылдын январь айында КР УКМКсы Афганистан менен Тажикстандын укук коргоо органдары менен биргеликте иш жүргүзүп, 1985-жылы туулган А.И. аттуу Кыргызстандын жаранын мекенине кайтарышты. Бул тууралуу УКМКнын коомчулук жана ММКлар менен байланыш бөлүмү билдирди.

Маалымат боюнча, А.И. аялы менен бирге 2009-жылдын сентябрында улуу агасы Анвардын чакыруусу боюнча, кийинчерээк, «Өзбекстан Ислам кыймылынын» андан аркы жардамы менен Кыргызстандан «Талибандар Кыймылынын» афган-пакистандык зонасына жөнөтүлгөн.

А.И.нин согушчандардын лагерине барышынын негизги себеби - агасы менен бирге «куралдуу джихад» өткөрүү ишмердүүлүгүнө катышууну каалагандыгы болгон.

Эки жума аралыгында физикалык жана куралдуу даярдыктан өткөн. Бирок, А.И.нин өз сөзү боюнча, согуш ишмердүүлүгүнө катышкан эмес.

Лагерде жүргөн убакта А.И. 2009-жылдын апрелинде улуу агасы Ильхомдун, ал эми 2010-жылдын 14-январында 20 согушчан менен бирге экинчи агасы Анвардын курман болгонун угат. Агалары өлгөндөн кийин ал өзүнүн жана аялынын өмүрүнөн чочулап, согушчандардын лагерин таштап кеткен.

2010-жылдын 21-январында Афганистандын укук коргоо органдары тарабынан кармалып, 1,5 жылга эркинен ажыратылган.

Көрсөтмө берип жатканда А.И. өзү кетирген катачылыкка кейип, жаш мекендештеринин террористтик уюмдардын чакыруусуна макул болуп, кайырмактарына илинбешин эскертти.

Азыркы учурда А.И.ге байланыштуу болгон материалдар УКМКнын тергөө органдары тарабынан каралып жатат. Анын афган-пакистандык зонадагы иштери тууралуу текшерүү иш-чаралары жүрүп жатат.