Баракелде - Бүгүн, 27-январда, премьер-министр Өмүрбек Бабанов Талас областына жумушчу сапары менен барды.

Өкмөттүн маалыматтык саясат бөлүмүнөн билдиришкендей, өкмөт башчысы адегенде Талас районунун Көк-Кашат айылында жайгашкан А.Огонбаев атындагы орто мектебинде болду.

Бул мектепке мурда Ө.Бабановдун буйругу менен 10 компьютер берилген.

Ө.Бабанов 11-класстын окуучуларына информатика сабагы өтүп жаткан компьютердик класста болду. Окуучулар менен баарлашып жатып, премьер-министр информатика боюнча сабактардын жумасына канча жолу болоорун, компьютердик сабаттуулукту өздөштүрүүнүн деңгээлине кызыкты.

«Азыркы жаңы технологиялар кылымында дайыма технологиялар жаатындагы билимибизди өркүндөтүп турушубуз керек. Силер – биздин келечегибизсиңер, ошондуктан, сапаттуу билим алууңар абдан маанилүү. Бул жерде күндүз окуучулар окуса, кечкисин жергиликтүү жашоочулар үчүн компьютердик курстарды уюштурса болот», - деди Ө.Бабанов.

Премьер-министр облустун губернатору Койсун Курманалиевага облустагы бардык мектептерде Интернетке кирүү мүмкүнчүлүгүн түзүүнү тапшырды.

«Республиканын бардык мектептеринде Интернетке кирүү мүмкүнчүлүгү болуш керек. Жергиликтүү бийлик органдарына бюджеттик салмактуу көмөк көрсөтүлүп жатат, алар көйгөйлүү маселелерди чечүүгө шарт түзөт. Ошондой эле информатика сабагын окуткан мугалимдердин айлык акыларын көтөрүү керек», - деди.

К.Курманалиеванын айтуусу боюнча, учурда облустагы орто мектептердин 60 пайызында Интернетке кирүү мүмкүнчүлүгү түзүлгөн . «Айыл округдарынын башчыларынын алдына 2 айдын ичинде областтын бардык мектептеринде Интернетке кирүү мүмкүнчүлүгүн түзүү боюнча милдеттер коюлган. Муну менен бирге айыл өкмөттөрдө да Интернетке кирүү мүмкүндүгүн түзүү боюнча иштер жүрүп жатат», - деп маалымдады губернатор.

Андан кийин премьер-министр биринчи класстын окуучулары үчүн өтүп жаткан «Мекен таануу» сабагында болду. Өкмөт башчы окуучулар менен сүйлөшүп, алардын билимдин адам турмушундагы мааниси жөнүндө пикирлерине кызыкты.

«Силер - биздин келечегибизсиңер. Силердин ар тараптуу өнүгүшүңөр жана сапаттуу билим алышыңар үчүн биз колубуздан келген шарттарды түзүп беришибиз керек. Ийгиликке жетиш үчүн сапаттуу билим алыш керек эмеспи», - деп айтты Ө.Бабанов.

Ошондой эле премьер-министр өкмөт иштеп чыккан республикалык бюджеттин долбоорун Жогорку Кеңеш колдоп берсе, 320 орундук орто мектептин имараты салынаары тууралуу билдирди. Учурда 60 жыл мурун салынган мектептин акыбалы авариялык деп таанылган.

Андан соң Ө.Бабанов мектептин жанында аны менен жолугушуу үчүн чогулган айыл тургундары менен сүйлөштү. Өкмөт башчы өкмөттүн «Стабилдүүлүк жана татыктуу жашоо» деген программасы жана «100 күндүк» өкмөттүн иш Планы тууралу кыскача айтып берди. Ошондой эле ал жолугушууга келгендердин суроолоруна жооп берип, алардын сунуштары менен каалоолорун укту.

Премьер-министр жумушчу сапарынын алкагында облустун активи менен жолугушуп, бир катар социалдык жана өндүрүш объектилерине баруусу күтүлүүдө.