Баракелде - Жогорку Кеңештин «Ата Журт» фракциясы 27-январдагы кезектеги жыйынында жаратылышты коргоо бейөкмөт «Асыр» коомдук бирикмеси тарабынан көтөрүлүп жаткан

Чүй облусунун Жайыл районунун Степное айылынын бала бакчасын кайтаруу маселесин талкуулады.

Жыйында аталган бирикменин төрагасы Карапбек Сереновдун айтымында, Степное айылындагы бала бакча Чек ара кызматына ижарага берилип кетиптир, бир топ элдин нааразычылыгы болуп жатат деди. «Элдер аны кайра бала бакча кылып кайтарып берүүнү суранып жатышат», - деди ал.

«Степное айылындагы бала бакча 2004-жылы ижарага Чек ара кызматына берилген, ижарага берүү мөөнөтү аныкталган эмес. Ал жерде азыр Чек ара кызматынын заставасы кайтарууну өткөрүшөт. Бирок жергиликтүү кеңеш бул бала бакчанын имараты башка максатта колдонулбасын деген чечим чыгарылган. Ал бакча 200 балага ылайыкталган», - деди Степное айылынын айыл башчысы Николай Бутько.

Ал эми депутат Ахматбек Келдибеков өкмөттүн окуу жайлардын, мектептердин, бала бакчалардын имараттары башка мекемелерге колдонууга берилбеши керек деген токтому бар, аны аткарыш керек. «Азыр жарандар бул боюнча нааразычылык билдирип жатышат. Ошондуктан, Кажы полициясына, акимге, райондук кеңешке бул бала бакчанын имаратын максаттуу пайдаланууну бир айдын ичинде карап чыгышсын деген тапшырманы берели. Ошондой эле, өкмөткө Чек ара кызматына имарат менен камсыз кылуу боюнча дагы тапшырманы карап чыгышсын деген сунушту киргизем. Себеби Чек ара кызматынын өзүнүн кайтаруу посту болуш керек», - деди ал.

Натыйжада фракция мүчөлөрү аталган сунуштардан турган фракциянын чечимин колдошту.