Баракелде - «Ачык саясат» гезитинин 3-февралда чыккан санында жазылгандай, «Тумар» радиосунун үн режиссерун сабап өлтүргөн Максат Эралиев буга чейин Түркия мамлекетинен төрт жолу депортацияланып, ошондой эле Максат Эралиев, Максат Аскарбеков, Максат Аскаров деген аттар менен жасалма бир нече паспорт көтөрүп жүргөндүгү ачыкталган. Ошондой эле, жаш туруп, жасалма паспорттун майын чыгара жасаткан Максат Эралиев буга чейин Жогорку Кеңештин депутаты Улан Чолпонбаевдин жардамчысы болгондугу айтылган.

«Бирок, Чолпонбаев ал маалыматты четке каккан жообун ИИМге билдирген. Бизге жеткен маалыматтарга караганда, М.Эралиев У.Чолпонбаевдин официалдуу эмес жардамчысы экен», - деп жазат гезит.

Анда жазылгандай, М.Эралиев депутаттын Бишкектеги бизнестеринин бири болгон «Бакарди» эс алуу клубунун «смотрящийи» болуп жүргөн.

«Бул тууралуу депутат У.Чолпонбаевдин өзүнөн билүү максатында кайрылып, жооп ала алган жокпуз. Депутаттын жардамчысына эки күн мурда суроолорду алдын ала жиберип да жооп ала албадык. Балким депутаттын жардамчылары бери жактан шефин кызганып, жок дедиртип, же жооп бергизбей коюп жатабы деп да турубуз», - деп жазат гезит.

Гезит жазгандай, жардамчысынын айтымында, эл өкүлү «гезиттер маалымат берсем, бурмалап салышат экен. Кечке эле айта беремби» деген шылтоо менен комментарий берүүдөн баш тартыптыр. Андай болсо жардамчысы журналисттен суроону эмне себептен алып калды?

«Эл өкүлү болгон соң, суроолорго кечке эле эмес — эгерде ак болсо бир күндө миң жолу болсо да журналисттерден качпай, жооп берүүдөн чарчабашы керек», - деп жазат гезит.

Гезитте жазылгандай, У.Чолпонбаевди деги эле кызмат ордунан табыш кыйын. Көмүскөдө жүргөн немеби, айтор, өздүк телефонун да жашырып, айланасындагы жардамчылары да шефин жашырышып, качан чалсаң, жоктон башканы айтышпайт экен.

«Мындан улам эл өкүлүнүн канча жүзү бар деген ойго келдик. Бир жүзү бизнесмен, экинчи жүзү түнкү клубдардын кожоюну, бир жүзү депутатпы? Деги эле бул көп жүздүү депутаттык маскасы качан сыйрылат», - деп жазат гезит.

Анда жазылгандай, гезиттин редакциясына Чолпонбаевдин дарегине айтылган суроолор күн өткөн сайын арбый баштаптыр.

«Элдин суроосунан качкан элдин депутатты кандай түшүнсөк болот? Ак-Суу районуна 35 боз үй тиктирип, А.Келдибековду жандап алып барып, эгемендүүлүктүн 20 жылдыгын белгилегенин угуп абдан сүйүндүк эле. Демек ал жакшылыктар депутаттын жөн гана саясий оюну болуп калабы?», - деп суроо салат гезит.

Гезитте жазылгандай, У.Чолпонбаевге тиешелүү «Бакарди» түнкү клубун өрттөгөндөр М.Эралиевден өч алууну көздөгөндөр дешет. Анткени, Максат Эралиев буга чейин көптөгөн адамдардын көкөйүнө көк таштай тийип жүрүптүр. Эл өкүлү криминал чөйрөсүнө «Хоп» аттуу каймана аты менен таанымал болгондон кийин, анын бизнесин караган тымызын жардамчысы албетте криминал чөйрөсүнө тиешеси бар адам болушу да толук ыктымал.

«Баарынан таң калычтуусу Жогорку Кеңеш — депутат У.Чолпонбаевдин дарегине айтылган дооматтарга көңүл бөлбөй, ал тууралуу маселени этика комитети көтөрбөй жатканы болууда. Же «карга карганын көзүн чокубайт» болуп жатабы?», - деп жазат гезит.

Анда белгилегендей, кандай болгон күндө да, депутаттын дарегине коомчулук тарабынан айтылган олуттуу айыптоолор парламент тарабынан көзөмөлгө алынып, иликтениши керек.

«Анткени, ал — эл башкарган, эл ишенген, бакандай болгон республиканын депутаттарынын бири. У.Чолпонбаев жогоруда жазылган сын-пикирге кайдыгер карабай, жооп берет деген үмүттөбүз», - деп жазат гезит.

Гезит У.Чолпонбаевдин бала чагынан баштап, кантип кримчөйрөсүнө аралашып калганын, кантип түнкү клубдардын ээси болгонун, андан соң саясат чөйрөсүнө кантип, ким аркылуу келгенин тереңирээк иликтөөнү баштаптыр.