Баракелде - Июнь окуясын тутанткан башкы каармандардын бири делген Кадыржан Батыров бир нече күн мурун маалымат каражатына интервью берип, 2010-жылдагы кайгылуу окуяга эч кандай күнөөсү жок экенин айтып, Убактылуу Өкмөт өзү күнөөлүү деп билдирди. Бирок эки улуттуу чабыштырган сепаратисттин мындай кылыгы коомчулук арасында кызуу талкууланып, ошол эле Кыргызстандагы күч органдары эл аралык издөөдө жүргөн июнь окуясынын уюштуруучуларын өлкөгө алып келип жазалоого аракеттер жүрүп жатканын айтышты. Ал эми Ошко расмий иш сапар менен барган президент Алмазбек Атамбаев июнь окуясында чыныгы куноолуу ким? - деген суроого жооп жакынкы күндөрү табылаарын билдирип, Ош окуясы боюнча кайрадан ийне- жибине чейин иликтөө боюнча тапшырма бергенин кошумчалады. Урматтуу радиоугармандар Июнь окуясын тутанткан деген өзбек сепаратисттерин Кыргызстанга алып келүү канчалык реалдуу? "Биринчи радионун" Сереп уктуруусу бол Суроого жооп издейт.

Июнь окуясында кимдин күнөөсү бар, жана ким канчалык денгээлде жоопко тартылыш керек деген суроо эки жылдан бери ачык келе жатат. Аталган окуясы 1 эмес 5 ар кандай комиссия иликтегени менен бүгүн анын жыйынтыгы ишке ашып жатат деп айтуу да аша чапкандык болуп калат. Ошондой эле окуяны териштирген акыркы депутаттык комиссия, атайын токтом кабыл алып, өкмөткө аткарууну буйруган. Эки жума мурун токтомдун аткарылышы тууралуу жооп алган депутаттар, күч органдарынан да өкмөттөн да канааттандыраарлык жооп албаганын айтышып, аны аягына чейин аткарууга Жогорку Кенеш өкмөткө дагы бир ай убакыт берди. Бирок, башкы прокурор Аида Салянованын айтымында, Жогорку Кенеш токтомго айрым аткара албас пункттарды да кошуп койгон.

А.Салянова: (Токтом 100% аткарылат деп айта албайм. Себеби арасында Бакиевди жана жакындарын издеп, кармап, алып келигиле деген пунту бар. Бирок Бакиев Белоруссияда жарандыгын алып алды, ошондой эле ал жактын бийлиги да бербейбиз деп жатат. Бул учурда прокуратура алсыз. Ал эми буларды эске албаганда токтомдун жарымынан көбүн аткарып койдук.)

А бирок, июнь окуясын уюштурду деген Батыров, Салахудино, Абдрасулов сыяктуу негизги өзбек улутунун сепаратисттери издөөдө жүргөнү менен Кыргызстанга келип кетип жүрүшөт деген маалыматтар бар деп, депутат Акылбек Султанов токтомдун аткарылышы тууралуу угууда айтканы бар. Ошондой эле алардын бизнестери Кыргызстанда жүрүп жатат, ал кимге катталып иш алып барып жатканы да белгисиз

А.Султанов: (Салахуддинов былтыр жайында Кыргызстанга күйө баласы каза болгондо келип кетти деген сөз болуп жатат. Ошондой эле Ином Абдрасулов да үйүнө келип кетип эле жүрөт деген сөздөр айтылып жатат. Булардын бизнестери да бүгүнкү күндө иштеп жатат)

Прокуратурада мындай маалыматтар жок болуп чыкты. Ал эми бизнестерине арест коюлганын Аида Салянова айтат. Мындан башка аталган сепаратисттер азыр кайда жүргөнү белгисиз.

А.Салянова: (Бизде Салахуддинов менен Абдрасулов келип кетип жатат деген маалымат жок. Экөө тен эл аралык издөөдө жүрөт. Батыровдун мүлкүнө арест салынган. Ошондой эле Кадыржан Батыров Швециянын жарандыгын алып алды деген маалымат Украинадан келген, бирок ал тактала элек.)

Бул учурда негизги кайгылуу окуяны козутуучу Кадыржан Батыров “кжинфо” маалымат булагында жайгашкан акыркы интервьюсунда Швецияда эле жашап жатканын айтат. Ошондой эле анын айрым бизнеси учурда Кыргызстан косманавты Салижан Шариповго катталып иштеп жатканын кошумчалайт. Мындан башка ал июнь окуясынын башында Убактылуу Өкмөт турганын айтып, ал эми Батыров өндүүлөр алардын куралына айланып калганын кошумчалайт.

К.Батыров: (Ооба Швеция өлкөсү мага башпаанек берип азыр ушул жердемин. Менин Кыргызстандагы бизнесимди айрымдарына арест салып койушту, бирок кээ бирлери Салижан Шариповго катталып калды. Мен билбейм ал кайсы мүлктөрүм экенин себеби көбүн эсе аялымдын мүлктөрү катталыптыр.)

Улуттук коопсуздук мамлекеттик комитетинин төрагасы Шамил Атаханов эл аралык издөөдө жүргөндөргө УКМК интерпол аркылуу атайын операцияларды жүргүзүп Кыргызстанга алып келүү чаралары пландалып жатканын айтты. Себеби президент Алмазбек Атамбаев баш болуп, чара көрүүгө талаптарды катуу койгонуну кошумчалады.

Ш.Атаханов: (Биз колдо бар мүмкүнчүлүктүн бардыгын колдоно элекбиз. Жакынкы убактарда июнь окуясын уюштурду деген кызыл тизмеге алынган адамдарга атайын операцияларды жасаганы жатабыз.)

Белгилей кетсек, президент Алмазбек Атамбаев июнь окуясы тууралуу күч түзүмдөрүнө окуяны толугу менен кайрадан карап, хронология менен тактоосун тапшырма берди. Учурда Ош шаарындагы эл менен жолугушуусунда Июнь окуясынын күнөөлүлөрү аныкталып жазаланаарын айтат.

А.Атамбаев: (Республикада коомдук коопсуздукту чындоо боюнча кечиктирилгис чараларды көрүү тууралуу указга кол койдум. Анын ичинде июнь-апрель окуяларын хронологиялык тартипте иликтеп чыгуусун тапшырма кылдым. Себеби буга чейин Атамбаев Батыровдун дачасына барып чай ичти деген маалымат чыгып кеткен. Эми чындап эле ким барганын биз иликтейбиз. Биз көрдүк өткөн жылы деле Батыровдун өкүлү косманавт Салижан Шарипов деген бул жакта жүрүп, президенттик шайлоодо да бир талапкерди колдоп жатты. Керек болсо мүлкүн да өзүнө каттаттырып алыптыр)

Кайгылуу окуяны ийне- жибине чейин иликтеп ким болбосун ээлеген ордуна жана кызматына карабастан жоопкерчилкке тартылышы керектиги айтылат. Ал эми парламент март айында кайрадан токтомдун аткарылышы тууралуу өкмөттүн маалыматын угууну пландап жатат.