Баракелде - «Де-факто» гезитинин 21-февралда чыккан санында жазылгандай, «Бүтүн Кыргызстан» жана «Ата Журт» партиялары буга чейин Мелис Мырзакматов башында турган «Улуттар биримдиги» партиясын колдоорун айтып чыккан.

Маалыматка ылайык, эми бул эки партиянын лидерлери Адахан Мадумаров менен Камчыбек Ташиев бир жумадан бери Ош шаарына барып, дал ушул партияга элди үгүттөп, эл менен жолугушуп жүрүштү. Бул жолугушууларында ачыктан ачык эле улутчулдук жана регионализм көрүнүп атат, деп жазат гезит.

Алардын: «М.Мырзакматов түштүктөн чыккан жигит болгондугу үчүн анын Ош шаар башчылыгына келишин бийлик каалабай атат», - деп айтканы ачык эле регионго бөлүп атпайбы. Мунусу да эч нерсе эмес. А.Мадумаров болсо «өзбектер, силер КСДПны колдоп, биздин билегибизге тээп атасыңар», - деп айтканына жыйындагы эл жакасын кармады. Бул президент болом деп жүргөн эки лидердин чыныгы деңгээлин көрсөтүп турбайбы, дейт гезит.

Камчыбек Ташиев жолугушуудагы сөзүндө «Кудай буюрса, 4-март биздин жеңиштин башталышы болот. 2005-жылы да Жалал-Абад шаарында ушул күнү эл көтөрүлүп, анан март революциясы болгон. Дагы айтам, 4-марттан биздин жеңиш башталат», - деп балп эткизди.

«Бул эмне, элди дагы бир көтөрүлүшкө үгүттөп атканыбы? Кайсы жеңишти айтып жатат жана кайсы душманды жеңгени атат», - деп суроо салат гезит.