Баракелде - Жаза аткаруу мамлекеттик кызматынын башчысы Шейшенбек Байзаков менен №1 тергөө абагынын жетекчиси Марс Жусупбековго карата кылмыш дүйнөсү тарабынан кол салуу даярдалып жатат. Бул тууралуу бүгүн, 22-февралда Жаза аткаруу мамлекеттик кызматынын басма сөз катчысы Александр Никсдорф маалымат жыйынында билдирди. Анын айтымында, мындай маалымат бир жума мурун ыкчам кызматтар тарабынан келип түшкөн.

«Өкмөт бул иш боюнча билет, биз рапорт жазып жибергенбиз. Азыркы учурда ИИМ жана УКМК тарабынан буйрук берүүчүлөрдү аныктоо иштери жүрүп жатат. Азыр Ш.Байзаковду эки жолдун бирөөсү менен кетиргилери келип атат, парламент аркылуу, же жалданма киши өлтүрүүчү аркылуу», - дейт А.Никсдорф.

Анын айтымында, бул №1-тергөө абагындагы камераларды жапканга байланыштуу.

Анын маалыматы боюнча, аталган тергөө абагында эле ай сайын 18 миң доллар «общактын» казынасына чогулуп турган. «Общактар» ачык камераларды аралап, камактагылардан акча талап кылып, жок болсо кыйнап, туугандарына телефон чалдырып акча суратып келишкен.

«Азыркы күндө №1-тергөө абагындагы бардык камералар жабылып, акча талап кылуу токтоду. Эгер ушундай камералар жабык боюнча калса кылмыш чөйрөсү болжол менен жылына 2 млн сом албай калышат экен. Мындай акчадан кур калып калбайлы деп сүйлөшүүгө аракет кылганынан майнап чыкпай, эми ушундай иштерге барып жатышат да», - деди А.Никсдорф.

Ал кошумчалагандай, кылмышкерлер Ш.Байзаковду кетирсе, анын ордуна алардын сөзүн уга турган башка бирөө келет деп жатышат.

Андан сырткары, А.Никсдорф Жаза аткаруу мекемесинин жетекчилигине кол салуу аракети жүрүп жатканын Жаза аткаруу тармагында мурун иштеп кеткендердин ушагы эмес, ыкчам кызматтын билдирүүсү экенин баса белгиледи.

Анын маалыматы боюнча, учурда Жаза аткаруу тармагындагы жетекчилердин өмүрү үчүн канча каражат сунушталганы аныктала элек.