Баракелде - Ысык-Көл областынын Каракол шаарында дарыгер- нарколог Бакыт Ордоковдун айтымында, расмий каттоодо 108 наркоман болсо, анын 92си наша, гашиш колдонгондор, ал эми 16 жараны героин, апийим сыяктуу  оор наркотикалык заттарды колдонгондор. Бул тууралуу аймактык кабарчы Замирбек Асаналиев билдирет.

Бул жогоруда белгиленгендей расмий каттоодон өткөндөр. «Биз аларды зордоп алып келип каттоого ала албайбыз. Өздөрү эрки менен дарыланууга максат коюп келсе, тартип сактоочулар кармап келишсе каттоого алабыз. Ал эми иш жүзүндө карай келсек наркотикалык заттарга кызыккандар  акыркы 5 жылда он эсе көбөйдү. Анын баарысы каттоодон өткөн жок да. Өзүңөр баамдай бергиле, наркомандардын санын. Биз орто окуу жайларында сурамжылоо, ангемелешүү жүргүзүү учурунда айрым  окуучулар нашааны тартууну кадыресе көнүмүш адат катары эсептегенин байкайбыз. Тартпаган жаштар өмүрүндө бир жолу тартып көргөнүн мойнуна алышат. Нашааны, гашишти колдонуунун  эң жаман жери аны тартып көнгөн адам таштай албай калат. Оор баңги заттары болгон героин, апийимди колдонгондордун 90 пайызы ушул гашиш, нашаа тартуудан башташкан. Ал эмес жөнөкөй нерсе көрүнгөн насвайда никотин, эфедрин заттары бар экенин унутпашыбыз керек,-дейт  областтык үй бүлөлүк дарыгерлер борборунун нарколог-дарыгери Бакыт  Ордоков.