Баракелде - Жогорку Кеңештин Мыйзамдуулук, укук тартиби жана кылмыштуулук менен күрөшүү боюнча комитетинин жыйынында 22-майда 2010-2011-жылдары жумуштан мыйзамсыз бошотулган Ички иштер министрлигинин кызматкерлеринин кайрылуулары каралды.

Ички иштер министри Зарылбек Рысалиевдин айтымында, он чактыдай милиция кызматкерлер коллегиянын чечими менен кызматтан алынган, 3 кызматкерге кылмыш иши козголгон. «Ал эми Улан Рыспеков өзүнүн арызы менен кызматтан бошотулган, Момунов 3 млн сомду жеп койгондугу үчүн кызматтан алынган. Ал эми Кулуев Мадияр 2011-жылы 23-мартта террорчулардын колунан 3 милиция кызматкери каза болгондугунан, коллегиянын чечими менен Октябрь РИИБ башчылыгынан жумуштан алынган. Эки жолу аны кызматка койгонбуз, бирок аны жамаат кабыл албай жатат», - деди министр.

Жыйында кызматтан алынган, нааразы болгон милиция кызматкерлеринин атынан Мадияр Кулуев сөз сүйлөп, мыйзамсыз кызматтан алынгандыгын билдирди. Ошондой эле ал Жогорку соттон утуп алгандыгын айтып, азыр ага 1,5 жылдан бери ишсиз жүргөндүгү боюнча 144 миң сом айлык төлөп жатышкандыгын айтты. «Мени террорчулардын колунан каза болгон үч милиция кызматкерлери үчүн кызматтан алышты. Министр «кызматтан өз ыктыярын менен кетип калбасаң, мени депутаттар жеп коет деп айткан. Өздүк курам мени кабыл албай жатышат деп саботаж жасашты. Бул боюнча эмне үчүн Башкы прокуратура баа бербейт?», - деп нааразы болду.

Натыйжада, комитет мүчөлөрү эки тараптын көз карашын уккан соң, Башкы прокуратурага бул маселеге укуктук баа берүү боюнча тапшырма берип, маселени жалпы жыйындардын талкуусуна койду.