Баракелде - Ноокат районнун жетекчиси З.Аскаров Кашкалдак жана А.Абдуллаев атындагы орто мектептери тарабынан өткөрүлгөн «Достук» фестивалынын ачылыш аземинде жаштар арасында ынтымакты бекемдөө максатында бул иш-чараны уюштургандарга терең ыраазычылык билдирди. Бул тууралуу «Ноокат таңы» райондук гезитинин кабарчысы Нуркамил Абдуллаев маалымдайт.

Аны менен катар район жетекчиси эзелтен базары да, мазары да бир эки элди бири-бирине кайраштырууну каалган күчтөр да жок эместигине токтолду.

«Биз ыйманды, ынтымакты туу туткан элбиз. Кыргыз менен өзбек куштун эки канатындай, кылымдар бою бири-бирине кыз берип, уул үйлөп кудаа сөөк болуп жашап келет. Бирок, доорлорду карытып келе жаткан ушундай ынтымактыгыбызды бузууну каалгандар да ондоп саналат. Райадминистрацияга кечээ жакында кайсы бир мамлекеттик эмес уюмдун өкүлдөрү келиптир. Биз эскертүү боюнча долбоор ишке ашыралы, кыргыздар тарапка да өзбектерге да офис ачып, социологиялык иликтөө иштерин жүргүзөлү. Кокус улуттар аралык мамиледе маселе жаралса, аны чечүү үчүн дароо жогор жакка билдиребиз дешет, бети–баштары кызарбай. Биз силерсиз эле өзүбүздүн маселени, мамилени чечип келгенбиз. Жакшысы эки элдин ортосуна түшпөй эле койгула. Силердей эл бузар, журт бузар уюмдун бизге кереги жок деп жолго салдык. Андыктан, сырттан келгендерге да кичине сергек мамиледе бололу. Долбоор деп, акча сунса эле кызыга бербейли. Ойлонуп иш кылалы», -деди аким өз сөзүндө.