Баракелде - «Параграф» гезитинин 24-майдагы санында азил иретинде Жогорку Кеңештеги депутаттарына ыйгарылган аттары жөнүндө маалымат чыгарды.

Чырмоок

Асилбек Жээнбеков

Атамбаевдин бийлигине Жээнбековдор чырмоокко айланышты. Араб мамлекеттеринде элчи болуп жүргөн акасы Жусупбек Шарипов, Ошто губернатор болуп жүргөн акасы Сооронбай Жээнбеков, парламентте спикер болуп жүргөн өзү баш болуп Атамбаевдин бийлигин чырмооктой чырмап келатышат. Чырмоокторду түп тамырынан жулуп ыргытса деле өсө берет. Чырмооктор турганда коррупцияга каршы күрөшөбүз деген бекер эле.

Чалкан

Өмүрбек Текебаев

Өмүрбек Чиркешович Акаевдик бийликке да, Бакиевдик бийликке да чалкан болуп, чагып келген. Бүгүнкү күнү да чалкандыгынан жазган жок. Ал маселени туура коюп жаңы мыйзам даярдап жатканы кыргыз элин кубандырат. Эмне үчүн миң сом пара алган майда чиновник он жылга кесилип, миллиондорду алгандар кутуруп, ал эми миллиарддарды жеген Акаев менен Бакиев жылуу-жумшак жүрүшү керек? Кармап келалбайбы, жок дегенде сыртынан соттоп коюшса элдин көксөсү суумак.

Күн карама

Чыныбай Турсунбеков

Акаев күн болуп мылжыйып турганда Чыныкең аны карап мылжыйып, ундан бизнес кылып алды. Бакиев күн болуп куйкалап турганда, башкалар куйкаланса да Чыныкең куйкаланган жок. Бакиевге башын ийип эстеликтей катты. КСДПга канча берип, Атамбаевге жакканын айта элек. Бирок, күн карама дале күндү карап турганы бышык.

Камгак

Феликс Кулов

Феликең камгактай учуп Акаевдин бийлигинин убайын көрдү. Камгактай учуп вице-президент болду, губернатор болду, министр болду, мэр болду. Андан башка мыкты жумуш калбай калып, камгак камакты көздөй талпактады. Камактагы камгакты март революциясы чыгарды эле, премьер-министрге жорголоду. Аяктан үйлөп ийди эле мини-ГЭСтин жетекчисине ыраазы болуп, коңулга кирген. Акылбек Жапаров коңулдан сүйрөп чыгып, кааласа фракция жетекчиси кылат, каалабаса камгактай үйлөп ийет экен.

Мать-и-мачеха

Ирина КАРАМУШКИНА

Госпожа Карамушкина кыргыз тилинин “мать-и-мачехасына” айланып баратат. Аны бир айга Тошкентке же Тбилициге командировкага жибериш керек. Онояктан келгенден кийин, анан кыргыз тилине “мать-и-мачеха” болгонун көрө жатабыз. Болбосо “баурдас” Астанага барса деле, казакча билбесе талаада калаарын эсине салып коёлу.

Роза

Роза Акназарова

Розалар кыргыздардын кадыр-баркын дүйнөлүк деңгээлге чыгарып келатат. Роза Отунбаева, тоюз Роза Акназарова дүйнөлүк деңгээлде ой жүгүрткөн чыгаан саясатчы. Биз кыргыздар өсүш үчүн Розаларды жана розаларды көбөйтүшүбүз керек. Албетте, кыздарыбыздын атын Роза деп коё берсек эле Розалар көбөйөт дечи. Бирок ал наристе Розаларды Розалардай билимдүү кылып өстүрүп, тарбиялоо оңой иш эмес.

Бетеге

Ахматбек Келдибеков

“Бектер кетет эл калат, бетеге кетет жер калат” дейт, жаш кезинен саясатка аралашкан Ахматбек мырза канча ирет бетеге болуп белди калтырып кетип, бийликте канча ирет гүлдөп чыкты. Анын эркин убагында Бакиевдик-Садыркуловдук бийлик да сындыра алган эмес. Ош окуяларында өзүнүн эр жүрөктүүлүгүн көрсөтүп элдин ишенимине ээ болгон. Чындыгы кыргызда Ахматбек мырзадай чыгаан саясатчы жок. Ошондуктан, бийликтегилер өздөрүнөн акылдуу адамдардан чоочуп турушат.

Ышкын

Камчыбек Ташиев

Ышкын кыргыздын улуттук тамагы болсо, Камчыбек Ташиев кыргыздын улуттук сыймыгына айланып баратат. Кыргыз эли деле СССР менен бирге Сталинди көрдү, Андроповду көрдү, Путинди сыртынан көрүп турат. Мамлекетти бир гана күчтүү инсан жакырчылык сазынан сүйрөп чыгат. “Үйдө баатыр, жоодо жок” мылжыйган коркок мамлекет башчылары Ак үйдө баатыр боло беришет. Ош окуясынын убагында Отунбаевадан башка бийликтегилер Ошко басып барышкандан коркуп турганда, Камчыбек мырза Туу болуп ызы-чууну басуу үчүн, октон да кайра тарткан эмес.

Кызгалдак

Камила Талиева

Кызгалдак тез эле күбүлүп түшүп калат. Бакиевдин убагында суйкайып сулуулугу менен Акмат Бакиевдин жетегинде губенатордун орун басарына чейин жеткен Талиева, апрель революциясынан соң талма болуп, күбүлүп түшкөн. Кулов көтөрүп чыкса, Куловду күбүйм деп кайрадан күбүлүп түштү. Азыркы мезгилде күбүлгөн кызгалдактай абалда жүрөт.

Беде

Бөдөш Мамырова

Беде бир тамыр жайган жерде өмүр боюу тамырын жыйбаган көп жылдык техникалык өсүмдүк. Бедеш тоюз, Дөдөш тоюз, Бөдөш Мамырова бир жерге тамырын кенен жайган саясатчы. Ал “Ар-Намыска” Талиевага окшоп талмасы кармаганда эле келген жок. Ал Куловго окшоп камгактай учпай, Жапаровго окшоп Таластан жаманатты болбой эле бир позицияда бекем келатат.

Уйгак

Жылдызкан Жолдошева

Жылдызкан айым бир жабышкан жерге уйгактай гана жабышат. Сүйлөгөнү да куйкумдуу күйгүзүп, өрттөп жиберет. Микрофонду болсо менчиктештирип алам деп Юстиция министрлигинде жүрөт деп угабыз. Уйгактай жабышып атып бийликтегилердин да жүрөгүнүн сары суусун алды. Ошондуктан, бийликтегилер аны уйгактай жабыштырып алышып кайда болсо да, илээлештирип жүрүшөт.

Мандалак

Динара Исаева

Жылдызкан айымдай микрофонду көздөй жулунбаганы менен Динара Исаева өз жерине барганда мандалактай жайнап, Жайыл баатырдын эстелигин каржылап, элим деген күйүп-бышып кызмат кылып келатат. Суу көтөрүп келаткан үч эне : “Кимдин баласы мыкты?“ деп, бир карыяны калыс кылышат экен. Биринчиси оңкосунан-тоңкосунан кетип, оюн коюп бериптир. Экинчиси созолонуп ырдайт экен. Үчүнчүсү чуркап келип энесинин колундагы эки чаканы көтөрүп кетиптир. Ошондо карыя мыкты деп үчүнчүсүнө баа берет. ЖКнын трибунасында оңкосунан-тоңкосунан кетип, созолонуп ырдаганча элине жардам берген жакшы эмеспи.