Баракелде - Төраганын орун басары Асия Сасыкбаева жетектеген Жогорку Кеңештин депутаттарынан турган топ 29-майда Грузия өкмөтүнүн делегациясы менен жолугушту.

Жогорку Кеңештин басма сөз кызматы билдиргендей, жолугушууга депутаттар Абдыжапар Бекматов, Абдыманап Кутушев, Ташполот Балтабаев, Турсунбай Бакир уулу жана Курманбек Дыйканбаев катышты. Грузия өкмөтүнүн делегациясынын курамында Эмгек, саламаттыкты сактоо жана социалдык коргоо боюнча мнистрдин орун басары Иракли Надареишвили, Камсыздандыруу компаниянын директору Николас Рамишвили, Билим берүү жана адилет министрликтердин өкүлдөрү бар.

 Төраганын орун басары Асия Сасыкбаева кыргыз тарап Грузия менен парламенттер аралык мамилелерди өркүндөтүү аракетинде деп белгиледи. Жолугушуу учурунда депутаттар мамлекет менен жеке сектордун натыйжалуу кооперациясында негизделген саламаттыкты сактоо системасын реформалоо маселелерине кызыкдар болушту. Айрыкча мамлекеттин камсыздандыруу компаниялары менен кызматташуусуна көңүл бурулду.

Маектешүү учурунда Эмгек, саламаттыкты сактоо жана социалдык коргоо боюнча министрдин орун басары Иракли Надареишвили ушул багытта Грузия өкмөтү тарабынан жасалган иштерге кыскача токтолуп, негизинен бейтаптардын укуктарын коргоо маселеси дыкат каралат деп айтты.

Мындан тышкары, жолугушууда социалдык секторду реформалоо боюнча пикир алмашуу жүрүп, алар социалдык коргоого муктаж болгон калк катмарын камсыздандыруу, балдардын укуктарын коргоо жана фостердик үй-бүлө системасын өнүктүрүү маселелери да талкууланды.