Баракелде - И.Арабаев атындагы Кыргыз мамлекеттик университетинде 7-июнда «Евразия элдеринин рухания-моралдык биримлиги - туран: өткөн доор жана келечек» аттуу илимий-практикалык конференция өттү. Бул тууралуу университеттин басма сөз кызматы билдирди.

Иш-чаранын максаты – азыркы кезде түрк ж.б. Евразия элдерин руханий-моралдык жактан бириктирип, кеңири маданий-руханий масштабда кызматташууга өбөлгө түзө турган маселелерди кароо, талкууга алуу болду.

Талкууда Азербайжандан келген коноктор, Кыргызстандагы интеллектуалдык чөйрөнүн, илимий жана билим берүү мекемелеринин өкүлдөрү, коомдук ишмерлер, диаспораларынын өкүлдөрүнүн баарлашуусу болуп, билдирүү, пикирлер айтылды.

Конференциядагы Кыргызстандын жана Азербайжандын илимий-интеллектуалдык, коомдук ишмерлеринин баарлашуусунун максаты - азыркы учурда өнүгүп, бекемделип жаткан Кыргызстан менен Азербайжандын ортосундагы экономикалык байланыштарды маданий-руханий кызматташуу жана элдердин достугу аркылуу бекемдөө.

Илимий-практикалык конференция алтайлык талантуу ырчы Ирина Кензина көмөкөй менен ырдоосу жана Манас айтуу менен башталып, абдан кызыктуу баарлашуу менен аяктады.

Азербайджан өкүлдөрүнүн айтуусунда, кыргыз эли Евразия аймагындагы башка элдерден айырмалаган өзгөчө касиети бар, түптүү эл жана анын түрк элдеринин арасындагы орду абдан бийик.

Иш-чараны уюштуруунун негизги демилгечиси - И.Арабаев атындагы университтетинин илимий иштер боюнча проректору Эмиль Каниметов, Азербайжан элдик-демократиялык партиясынын төрагасы Рафик Турабхан оглунун, окумуштуулардын, коомдук ишмерлердин чечими менен конференциянын соңунда атайын резолюция кабыл алынды.

Резолюцияда азыркы учурдагы Евразия жана түрк элдеринин достугун, маданий жана билим берүү тармагындагы байланышын бекемдөө зарыл экендиги айтылып, руханий-моралдык биримдик эң башкы орунда тураары белгиленди.