Баракелде - Жалал-Абад облусунун жергиликтүү жашоочулары облус аймагында ишмердүүлүгүн жүргүзүп жаткан «Бон Вояж», «Сабина Бизнес», «Фортуна», «Кью Нет» жана  «Даймонд Холидей» деген аталыштагы жоопкерчилиги чектелген коомдорунун үстүнөн козголгон кылмыш иштеринин соттук кароосу боюнча нааразы экендигин айтышып, соттун адилет чечим чыгарышын талап кылып жашыта. Бул тууралуу Жалал-Абад областтык Ички иштер башкармалыгынын башчысы Нурдин Маликов билдирди, деп маалымдады «Баракелденин» түштүк аймагы боюнча өкүлчүлүгүнүн кабарчысы.

М.Нурдиновдун берген маалыматы боюнча «Бон-Вояж» жоопкерчилиги чектелген коомунун түзүүчүсү Ноокен районунун Кочкор-Ата шаарчасынын 1976-жылы туулган Б.И. аттуу жашоочусу болуп эсептелет. Анын үстүнөн 2011-жылы КР Кылмыш жаза кодексинин 166-беренесинин негизинде кылмыш иши козголгон.

«Жалпысынан «Бон Вояж» ЖЧКму боюнча Ноокен районунун тургундарынан 29 арыз-даттануулар түшкөн. Материалдык чыгым 8 млн сомду түзүп, дагы деле кайтарылган эмес.  Бул боюнча кылмыш иши боюнча Ноокен райондук соту тарабынан бул жылдын апрель айында соттук кароо өткөрүлүп, жаңы ачылган жагдайларга байланыштуу Ноокен райондук прокуратурасына кайрадан кароого жиберилди», - дейт башкармалыктын башчысы.

Н.Маликов белгилегендей, дагы бир жоопкерчилиги чектелген «Сабина Бизнес» коомунун түзүүчүсү Бишкек шаарынын Ден Сояпин көчөсүнүн 1971-жылы туулган К.Г. аттуу тургуну. Анын үстүнөн 2011-жылы Ноокен райондук Прокуратурасы тарабынан КР Кылмыш жаза кодексинин 166-беренесинин негизинде кылмыш иши козголгон. «Сабина бизнес» ЖЧКсы боюнча Ноокен районунун тургундарынан 579 арыз-даттануулар түшкөн. Материалдык чыгым 34 млн 392 миң 350 сомду түзүп, азыркыга дейре күндө кайтарылган эмес.

Аталган кылмыш иши 2011-жылы Ноокен райондук сот кароосуна жөнөтүлүп, аталган сот чечими менен Г.К. 10 жылдык мөөнөткө эркинен ажыратылган. Бирок анын колунда жаш баласы болгондуктан баласы 18 жашка чыкканга чейин жаза өтөөдөн убактылуу бошотулган.

«Фортуна» ЖЧК түзүүчүсү Ноокен районунун Кочкор-Ата шаарчасынын М.Э. аттуу тургунунун үстүнөн 2011-жылы Ноокен РИИБ тарабынан КР Кылмыш жаза кодексинин 166-беренесине ылайык, кылмыш иши козголгон. Материалдык чыгым 31 млн. 139 миң 748 сом түзүп, анын ичинен 120 миң 500 америка доллары жана 1 млн  204 миң 250 сом кайтарылган. Бул коом боюнча 430 арыз-даттануулар түшкөн. Бул сумма Ноокен райондук сотунун чечими менен ар бир жабырлануучуга 4795 сомдон кайтарылып берилген.

Аталган кылмыш иши Ноокен райондук сотунун кароосуна жөнөтүлүп, аталган сот чечими менен М.Э. 13 жылга эркинен ажыратылган.

«Башкармалык тарабынан учурда жогоруда аталган коомдорго Сузак, Базар-Коргон жана Жалал-Абад шаарынын тургундарынан 370ке жакын жарандар арызданууга даяр экендиги аныкталды», - дейт М.Нурдинов.