Баракелде - Түрк тилдүү өлкөлөрдүн Парламенттик ассамблеясынын (ТүркПА) катышуучу-өлкөлөрүнүн парламенттик делегация башчылары – Жогорку Кеңештин төрагасы Асылбек Жээнбеков, Азербайжандын Милли Межилисинин төрагасы Октай Асадов, Казакстандын Парламентинин Мажилисинин төрагасы Нурлан Нигматулин жана Түркиянын Улуу Улуттук Жыйынынын төрагасы Жемил Чичек ТүркПАнын Ш пленардык жыйынынын жыйынтыгы боюнча маалымат-жыйын өткөрдү.

Жогорку Кеңештин басма сөз кызматы билдиргендей, төрага Асылбек Жээнбеков ТүркПАнын Бишкек жыйыны өлкөлөрдүн ортосундагы байланыштарды бекемдөөнүн жаңы кадамы боло турганын айтты. «Биз бүгүн көптөгөн тармактар боюнча кызматташууларды кеңейтүү үчүн зарыл шарттарды түзүүгө багытталган бир катар маанилүү чечимдерди кабыл алдык», - деп билдирди ал.

Ошондой эле, ТүркПАга төрагалык кылуу озуйпасы Казакстандан Кыргызстанга өткөндүгүнө токтолгон төрага бул эл аралык уюмдун төрагасы катары Кыргызстандын негизги максаты - баардык тараптарга пайдалуу саясый, экономикалык, маданий кызматташтыкты бекемдөө эле эмес, ошондой эле жалпы түрк дүйнөсүнүн баа жеткис мурастарын адамзат жетишкендиктеринин алтын казынасына кошуу болуп санала тургандыгын да айтты.

«Биз, Жогорку Кеңештин депутаттары, анын ичинде мен өзүм да төрага катары, эл аралык деңгээлде ТүркПА ишмердүүлүгүнүн натыйжалуулугун жана анын кадыр-баркын көтөрүүгө бар күч-аракетибизди жумшайбыз. ТүркПА эл аралык кызматташтыктын үлгүсү болууга тийиш», - деп баса белгиледи төрага.

Ошондой эле, ал Кыргызстан парламенттер аралык кызматташтыкты өнүктүрүүнү гана эмес, Түрк тилдүү өлкө башчыларынын деңгээлиндеги Кызматташтык кеңешинин алкагында да өнөктөш өлкөлөр менен кызматташтык мамиле түзүп келе жаткандыгын баса белгиледи. «Эми, келерки кадамыбыз 2012-жылы Бишкек шаарында Түрк тилдүү мамлекеттер Кеңешинин Саммитин өткөрүү болуп калат. ТүркПАнын азыркы отурумунун алкагында биз пландаштырылган баардык иш-чараларды жүзөгө ашыра алдык», - деп жыйынтыктады өз сөзүн Асылбек Жээнбеков.

ТүркПА катышуучу-өлкөлөрдүн парламенттик делегация башчылары журналисттердин Уюмдун келечек максаттары менен милдеттерине байланыштуу баардык суроолоруна жооп берди. Алар жаш уюм катары ТүркПАнын бир катар келечектүү демилгелери менен долбоорлору бар экендигин, аларды биргелешип ишке ашыра тургандыгын билдирди.

Фото: ЖК басма сөз кызматы