Баракелде - «Жер казынасы жөнүндө» баштаган бир катар мыйзам долбоорлору боюнча маалымат берген Экономика жана монополияга каршы саясат министри Темир Сариевдин айтымында, тоо-кен өнөр жай тармагын натыйжалуу башкаруу - өлкөнүн экономикалык жана социалдык туруктуу өнүгүү жолуна түшүүсүнө түрткү берет. Бул тууралуу ЖК басма сөз кызматы билдирди.

«Азыркы келип жаткан инвестициялар көлөмү жетишсиз, колдогу мүмкүнчүлүктөрдүн баарын сарамжалдуу пайлануу зарылчылыгы бар», - дейт ал.

Ошондуктан, кен иштетүү тармагындагы түзүлгөн кырдаалды оңдоо жана анын ишин ыраатташтыруу максатында, «Жер казынасы жөнүндө» жаңы мыйзамды кабыл алуу, ошондой эле «Салыктык эмес төлөмдөр жөнүндө» мыйзамга, КР Жер кодекси менен КР Салык кодексине тиешелүү түзөтүүлөрдү киргизүү зарылчылыгы бышып жетилген. Каралып жаткан мыйзамдар тоо-кен тармагындагы ишти кайра курууга багытталган.

«Жер казынасы жөнүндө» мыйзам долбоорунун жоболорунда негизинен ишти мамлекеттик жөнгө салуунун административдик усулун экономикалык усулга алмаштыруу чаралары каралган. Жер казына байлыктары атайын сынак аркылуу бериле баштайт. Кенди иштетүүгө лицензия алган компаниялар аны белгилүү бир мөөнөттө иштете баштоого тийиш. Эгер андай болбосо, компания туруксуздук төлөмүн төгүүгө аргасыз болот.

Талкуу жүрүшүндө иш-чаранын катышуучулары тарабынан жогорку кирешеден салык алуу чарасы Кыргызстанга келүүчү инвесторлорду чочута тургандыгы баса белгиленди. Мисалы, депутат Жылдызкан Жолдошова «Кумтөр» алтын кенинин айланасында түзүлгөн кырдаал Жогорку Кеңеште каралып жаткандыгын, ал маселенин башы ачылганча мыйзам долбоорлорун токтото туруу сунушун киргизди. Ал эми министрдин пикиринде, тескерисинче бул мыйзам жер казынасын иштетүү иштеринин жөнгө салынуусуна жол ачат.

Жер казынасын сарамжалдуу иштетүүгө багытталган мыйзам долбоорлорунун топтому биринчи окууда добуш берүүгө жөнөтүлдү.