Баракелде - Кыргызстанда жарандардын паспортунун мөөнөтү 15 жылга узартылды, деп маалымдады Жогорку Кеңештин депутаты Равшан Жээнбеков 26-июнда ЖК комитетинде.

Мындай маалымат Адам укуктары, конституциялык мыйзамдар жана мамлекеттик түзүлүш боюнча комитеттин жыйынында экинчи окууда кабыл алынган «Кыргыз Республикасынын жаранынын паспорту жөнүндө» мыйзам долбоорун кароо маалында айтылды.

Р.Жээнбековдун айтымында, 3-окууда бир катар депутаттардын сунуштары эске алынды. «Жарандардын паспорттордун мөөнөтү 10 жылдан 15 жылга узартылды. Ошондой эле 50 жаштан кийин жарандарга паспортторду алмаштырбоого мүмкүнчүлүк түзүлүүдө. Ал эми паспорттогу үй-бүлөлүк статус боюнча жана жашаган дареги боюнча графалар алынып салынды. Бул бир катар жарандык уюмдардын сунушу менен киргизилип жатат», - деди ал.

Талкуу учурунда депутат Абдыжапар Бегматов паспортто жарандардын жашаган дарегин калтырып коюш керектигин айтты. «Эртең эле жергиликтүү кеңештерде шайлоо болот. Жарандардын жашаган жерин паспортто көрөсөтүп койбосок, бир шайлоо участогуна шайлоочулар топтолуп, шайлоодо башаламандык болот», - деди ал.

Натыйжада, бул мыйзам долбоору 3-окууда кабыл алынды.