Баракелде - Жогорку Кеңештин депутаты Надира Нарматова жакында Ош облусунун Ноокат районунун жашоочулары менен жолугушуп, айыл өкмөттөрдө аткарылып жаткан иштер жана көйгөйлүү маселелер менен таанышып кайтты. Бул жолугушууда депутат менен биргеликте “Ош-Сары-Таш-Иркештам” жол курулуш башкармалыгынын башкы инженери Алтынбек Залов, «Империал групп» ЖЧКнын башкы директору Ислан Сарымсаков, Ноокат ДЭП ишканасынын жетекчиси Чиркешбай Сактанов, «Асфальт бетон» АКнын жетекчиси Кабулжан Мухтаров, Ноокат райондук мамлекеттик администрациясынын башчысы-акимдин орун басары Жумагүл Ураимова катышышты.

Кашкалдак айылындагы “Чапаев-Интернациональ” көчөсүнүн ремонт иштери (узундугу 1,8 км) бүткөндүгүнө байланыштуу депутаттын катышуусу менен анын ачылышы болду.

Депутат ошол эле айылдын “Айбек” участкасындагы Ботоев көчөсүнүн ремонт иштеринин башталышы жана “Айбек” айылындагы орто мектебинин курулушунун жүрүшү боюнча маалымат алды. Кыргыз-Ата айыл өкмөтүнүн «Тельман-Кара-Кой» жолун асфальттоо боюнча каржылоо маселеси жана башка суроо-талаптар угулду.

Депутат Н.Нарматова ошондой эле Бел-Өрүк айылдык округунун тургундары менен Ноокат-Бел-Өрүк автожолунун акыбалы боюнча жолугушуу өткөрүп, алардын суроо-талаптарын укту.