Баракелде - Жогорку Кеңештин депутаты Бакыт Төрөбаев баштаган Нарын, Ысык-Көл жана Жалал-Абад областынын бир катар фермер-дыйкандары учурда Германияда айыл-чарба ишканалары менен таанышып жүрөт. Бул тууралуу парламенттин басма сөз кызматы маалымдады.

Анын негизги максат – Германиянын айыл-чарба тармагы менен таанышып, немец кесиптештери менен тажрыйба алмашуу.

Депутаттын берген маалыматына караганда, кыргызстандык фермерлер Германиянын Кронет айыл-чарба шаймандарын чыгаруучу заводу менен таанышып, бир топ келишимдерди түзүп, байланышып иштөө жолдорун аныкташты.

Мындан тышкары делегация мүчөлөрү «Амазона» жана «Гриме» деп аталган картошка, сабиз жана кызылча жыйноочу техниканы чагарган заводдун иши менен таанышып, алардын менеджерлери менен сүйлөшүүлөрдү жүргүздү. Германиядагы Иваникс деп аталган малга берилүүчү тоют чыгаруучу заводдо да болушту.

Депутат Б.Төрөбаев бул иш сапардын дагы бир негизги максаты - Кыргызстандын ар бир аймагына машина-трактордук станцияларды (МТС) ачуу аракети деди.

Эске салсак, ушул жылдын февраль айында Б.Төрөбаевдин аракети менен Жалал-Абад областында бир нече МТС ачылган. Башка областтын фермер-дыйкандары өлкөнүн башка аймактарында да МТСтерди ачып, бул демилгени республика боюнча жайылтууну көздөп жатышат.