Баракелде - Бүгүн, 26-июнь күнү Нарын облусунун губернатору Канатбек Муратбеков иш кеңсесинде БУУнун Өнүктүрүү Программасынын Кыргызстандагы туруктуу өкүлүнүн кеңешчиси Эркинбек Касыбеков жана БУУӨПтүн Нарын облусу боюнча жаңы дайындалган аймактык менеджери Бакыт Шерипбаев менен жолугушту.

Аймактык кабарчы Күмөндөр Усуптегин билдиргендей, тараптардын сүйлөшүүсү ачык айкындуулукта жана өз ара сын пикирлерди ортого салуу менен өткөрүлдү.

Өз сөзүндө Э.Касыбеков БУУӨПтө жаңылануулар жүрүп жаткандыгын белгилөө менен Нарын облусунда «электрондук айыл өкмөт» долбоору ишке ашырылаарлыгын билдирди. «Туура, биз сиздерге аны кылгыла, муну кылгыла деп айта албайбыз. Бирок ПРООНдун иши чынында көзгө көрүнбөй жатат. Айтылгандар сөз бойдон эле калууда. Көрүнүктүү иш жок болууда. Биз сиздер билгендей айыл чарбалуу, мал чарбалуу аймакбыз. Ушул эки тармакка эле майдалабай жардам кылсаңыздар демекчибиз», - деген пикирин билдирди губернатор.

Мындай жүйөгө программанын жаңы менеджери негизинен кошулду. «Айтылган сындарды туура кабыл алабыз. Ошондуктан, сиздер менен бирдикте чогуу жумуш жасап, бардык мүмкүнчүлүктөрдү бир жерге топтойлу деп жатабыз», - деди Б.Шерипбеков.