Баракелде - Жогорку Кеңештин депутаттары 29-июндагы кезексиз пленардык жыйында сугат жерлерди бир категориядан экинчи бир категорияга которууга багытталган мыйзам долбоорлорун талкуулашты.

Жер участкалар маселеси боюнча түзүлгөн комиссиянын төрагасы Эсенгул Исаковдун айтымында, «Жер участокторду которуу (трансформациялоо) жөнүндө» мыйзам долбоору жана «Айрым мыйзам актыларына өзгөртүүлөрдү жана толуктоолорду киргизүү жөнүндө» мыйзам долбоорлору бир пакет менен талкууга коюлуп жатат. «Бул мыйзам долбоорлору менен жер участокторун бир категориядан башкасына, же бир түрүнөн башкасына которуунун (трансформациялоонун) укуктук негиздерин, шарттарын жана тартибин аныктайт. Мурда айдоо аянттарына бак-даракты өстүрүүгө уруксат берилбей келген. Азыр буга уруксат берип жатабыз. Өзгөчө баалуу жерлерге, бак-барактуу жерлерге курулуш иштерин жүргүзүүгө уруксат берген жерибиз жок», - деди ал.

Талкуу учурунда КСДП фракциясынын депутаты Жусубали Исаев жерлерди трансформациялай коебуз деп жакшы жерлерден айрылабыз деди. «4-5 жыл мурун трансформациялай албаган жерлерди акимдерге, губернаторлорго жакшынакай нан кылып беребиз. Германияда үйлөр тоонун этектеринде салынат, алар эч качан айдоо жерлерине үй салышпайт. Азыр бул мыйзам менен жакшынакай, эң бир керектүү жерлерди жокко чыгарып алабыз. Эл бизден сурап атат деп эле жасабаш керек. Биз бүгүнкү күн мненен жашабайлыкчы, эртеңки күндү дагы ойлош керек», - деди ал.

Натыйжада бул мыйзам долбоорлору добуш берүү күнүнө жиберилди.