Баракелде - Бүгүн, 5-июлда Талас облусунун Бакай-Ата районунун Өзгөрүш айылынын тургундары өзүлөрүнүн атактуу жердеши грек-рим күрөшү боюнча Эл аралык класстагы спорттун мастери, Азиянын чемпиону Арсен Эралиевди үстүбүздөгү жылдын август айынын башында Лондон шаарында боло турган олимпидалык оюндарга салтанаттуу узатышты.
Талас облусунун губернаторунун басма сөз катчысы Мухамеджан Суранчиевдин айтымында, мыкты спортсмен жердешин узатууга келген Талас облусунун губернатору Койсун Курманалиева, Жогорку Кеңештин депутаты Дастан Жумабеков, шаар-райондордун жетекчилери жана айыл аксакалдары олимпиадага катышуу укугун жеңип алган Арсен Эралиевге куттуктоо сөздөрүн айтышып, олимпиададан жемиштүү кайтышын каалап кетишти. Таластыктар А.Эралиевге жол киреге деп 400 миң сомдон ашык акча чогултушуп, ардагер спортсмендер күлүк атка мингизишип, ак тилек жолдогон баталарын беришти.
А.Эралиев бул дүйнөлүк чоң мелдеште жеңишке жетишүүгө бардык күч-аракетин жумшарын билдирди.




















Пикир калтыруу бөлүмү убактылуу жабык