Баракелде - Ысык-Көл облусунда оор кылмыш жасагандыгы үчүн эки милиция кызматкери кылмыш жоопкерчилигине тартылды. Бул тууралуу Ысык-Көл облусунун ИИБнын пресс-катчысы Сталбек Усубакунов билдирди.

14-июлда Кыргызстандын ИИМнин орун басары Мелис Турганбаев катышкан оперативдүү кеңешме болуп өттү. Ал кеңешмеде Ысык-Көл ИИББнын биринчи жарым жылдыктагы ишмердүүлүгүнүн жыйынтыктары каралды. Тагыраак айтканда, оор кылмыштардын бетин ачуу, бириккен кылмыштуу топтор, диний экстремисттер менен күрөшүү, ИИБдин кызматкерлеринин тартиптери каралды.

ИИББнын пресс-катчысынын билдиришинче, министрдин орун басары М.Турганбаев оор кылмыштардын бетин ачуудагы жана курорттук сезонундагы тартипти сактоону камсыз кылуудагы жакшы көрсөткүчтөрдү белгилеп өттү.

Кеңешме учурунда Ысык-Көл облусунун ИИББнин жетекчиси Мырзабек Исмаилов келечекте кызматкерлердин тартибине байланышкан маселелер жок болоорун жана облустун ИИББнин эки кызматкери кылмыш жоопкерчилигине тартылгандыгын белгиледи, деп билдирет пресс-катчы.

М.Исмаиловдун айтымында, милиция кызматкерлеринин бирөөсү жол кырсыгына катышса, экинчиси адам өлүмүнө алып келген мушташка катыштыгы бар деген шек менен кылмыш жообуна тартылган.

«Биздин кызматкер мушташ болгон жерге жөнөтүлгөн, мушташ учурунда ал бир адамды согуп жиберген, анын натыйжасында ал адам каза болуп калган», - деди облусттук ИИББнын пресс-катчысы.