Баракелде - Үстүбүздөгү жылы 18-июлда Чүй облусунун Суусамыр өрөөнүндө улуттук оюндар, концерттик номерлер менен коштолгон Талас, Манас жана Бакай-Ата райондорунун малчыларынын салтанаттуу слёту болуп өттү.

Жайыт департаментинин басма сөз кызматы билдиргендей, анда мал чарбачылыгы жаатында мыкты ийгиликтерге жетишкен, жайыт реформасына активдүү катышып, жайыттардын инфраструктурасын ондоого чоң салымын кошкон алдынкы фермерлерге ардак граммоталары менен атайын белектер тапшырылды.

Бул иш-чарага Талас облусунун губернатору К.Курманалиева, райондордун акимдери, айыл округ башчылары жана жайыт комитеттеринин төрагалары жана Айыл чарба министрлигинин алдындагы Жайыт департаментинин адистери катышты.

Чогулушта Талас облусунун губернатору Койсун Курманалиева малчыларды жетишкен ийгиликтери менен куттуктап, алдынкы фермерлерге облустун, райондун жана айыл чарба министрлигинин ардак грамоталарын тапшырды. Андан тышкары, Суусамырды жердеген малчылардын суроо талап, өтүнүчтөрүн укту. Малчылар губернаторго негизинен Суусамырды убактылуу жердеп, мал мүлкү менен алектенип жүргөн элге ыңгайлуу болушу үчүн атайын ветеринардык жана медициналык аптекаларды ачып берүүнү суранышты. Губернатор бул маселени ар тараптан талдап көрүп, жардам берүүгө убада берди.

Жайыт департаментинин атынан Талас районуна караштуу «Кеңешбек» дыйкан чарбасынын башчысы Кеңешбек Токтоналиев ардак граммотасы менен сыйланды. Бул адам Суусамыр жайлоосуна 15 жылдан бери чыгып, жайыттарды сарамжалдуу, туура пайдаланып, убагында жайыт которуштуруп малын көбөйтүү менен башкаларга үлгү болгон.