Баракелде - Жогорку Кеңештин Коррупцияга каршы аракет боюнча комитетинин төрагасы Туратбек Мадылбеков Чүй облусунун Жайыл жана Панфилов райондорунун тургундары менен жолугушуп, аймакта орун алган көйгөйлүү маселелер жаатында пикир алышты.

ЖК басма сөз кызматынын маалыматына ылайык, депутат жергиликтүү тургундарга кыргыз парламентинин кезектеги сессиясынын жыйынтыктары тууралуу учкай маалымат берди. Ошону менен бирге, ал Жогорку Кеңеш тарабынан коррупцияга каршы күрөшүүгө багытталган мыйзам долбоорлорунун топтому кабыл алынгандыгы, алардын өзгөчөлүгү багытында ой бөлүштү.

Жолугушуу жүрүшүндө Жайыл районундагы Эрик-Туу айыл округунун жашоочулары аймактагы бир катар көйгөйлүү маселелерди көтөрүп, алардын чечилишине көмөк көрсөтүү өтүнүчү менен кайрылды. Алардын айтымында, таза суу менен камсыз кылуу башынан эле башкы көйгөйлөрдүн бири болуп келет. Ошондой эле, айыл арасындагы жолдорду оңдоп-түзөө, клубдарды калыбына келтирүү, спорт аянтчаларын куруу маселелери да айтылды.

Ал эми Панфилов айылынын тургундары сугат суунун жетишсиздигин айтат. Сугат суулары коңшу Казакстан менен бөлүштүрүлүп жаткандыктан, жай аптабында анын жетишсиздигинин айынан талаш-тартыштар жаралууда. Ошондой эле, элет жергесиндеги техпарктарды жаңыртууга да мезгил жетти. Ал үчүн айыл чарба техникаларын лизингге алуу маселеси чечилүүгө тийиш. Андан сырткары, жергиликтүү калк «Кайыңды» алтын кенин иштетүүгө каршы чыгып жаткандыгы да белгилүү болду. Алардын пикиринде, кен иштетүү экологиялык коркунучка алып келет.

Депутат Т.Мадылбеков шайлоочулардын көптөгөн суроолоруна жооп берүү менен, көйгөйлүү маселелердин чечилишине КР өкмөтү жана жергиликтүү өз алдынча башкаруу органдары менен бирге көмөк көрсөтүүгө убада берди.