Баракелде - Ош шаарындагы Адам укуктары боюнча «Эдвокаси борборунун» маалыматы боюнча, шаардагы  Монуев, Мажүрүм-Тал жана Пахта көчөлөрүндөгү  үйлөрдү сүрүү боюнча өз үйлөрүнүн бузулушуна 19 жашоочу макулдугун берген. Бул тууралуу «Баракелденин» түштүк аймагы боюнча өкүлчүлүгүнүн кабарчысы билдирди.

Маалыматка ылайык, аталган көчөдөгү жашоочулар РСК банкынан өз эсептерин да ача башташкан. Ал эсепке келишимде каралган акчалар түшө баштаган. Алардын айрымдары бузула турган үйлөрүнө компенсацияларын ала алышат.

Буга чейин маалымдалып келгендей, Ош шаар бийлиги бул жылы Монуев көчөсүн Ак-Буура көчөсүнө чейин улантууну пландаштырган. Мына ушуга байланыштуу Монуев көчөсүндө жайгашкан 22 үйдү бузуп, алып чыгып салуу каралган. 

Үйлөрү бузула турган үй-бүлөлөргө шаар бийлиги материалдык компенсация төлөп берет.

Алдын ала ар бир бузула турган үй бааланып, анын сметалык баасы түзүлгөн.

Материалдык компенсациянын жалпы суммасы 16 млн сомду түзөт. Каржылоо жергиликтүү бюджет аркылуу жүргүзүлөт.

Эске сала кетсек, Монуев көчөсүн Ак-Буура көчөсүнө чейин узартуу – бул шаардагы унаа тыгынын жоюу максатында жана шаардын башкы планын ишке ашыруу максатында жүргүзүлүп жатат.