Баракелде - Ички иштер министрлигинин дарегине түшкөн кайрылуулар менен талаптардын негизинде Башкы прокуратуранын тапшырмасы менен Кылмыш-жаза процессуалдык кодексинин 163-беренесинин 2-бөлүгүнүн талаптарына ылайык Ички иштер министрлиги өткөн шайлоолор боюнча Кылмыш-жаза кодексинин 141 беренесинин 1 жана 2-пунктарына ылайык кылмыш ишин козгоду. (Шайлоо документтерин, референдумдун документтерин бурмалоо же добуштарды туура эмес эсептөө).

Мындай маалымат ички иштер министри Кубатбек Байболовдун кайрылуусунда айттылды.

«Биз иликтеп жаткан өткөн шайлоолор боюнча кылмыш ишине байланыштуу фактылар бар болсо бизге жөнөтсөңүздөр болот. Шайлоолордун жыйынтыгын бурмалагандардын бардыгы тең жаза жоопкерчилигине тартылат. Ансыз мындан ары акыйкат шайлоого жол ачылышы мүмкүн эмес», - дейт К.Байболов.

Эскерте кетсек, Кылмыш-жаза кодексинин 141-беренесине ылайык, шайлоо документтерин, референдумдун документтерин бурмалоо, добуштарды атайылап туура эмес эсептөө же шайлоонун, референдумдун натыйжаларын атайылап туура эмес чыгаруу, добуш берүүнун жашырындуулугун же тартибин бузуу, эгерде бул жосундар шайлоо комиссиясын, демилгелүү топтун же референдум өткөрүү боюнча комиссиянын мүчөсү тарабынан жасалса, ушул эле аракеттер шайлоо комиссиясынын же референдум өткөрүү боюнча комиссиясынын төрагасы, төрагасынын орун басары, катчысы тарабынын ага тете болгон алдын ала жең ичинен бүтүм жасалса - эсептик көрсөткүчтүн беш жүздөн миңге чейинки өлчөмдө айып салууга, же үч жылдан жети жылга чейин эркиндигинен ажыратууга жазаланат.